ភ្នំពេញ៖ ប្រធានគណបក្សប្រជាជនកម្ពុជា សម្តេចតេជោ ហ៊ុន សែន និងថ្នាក់ដឹកនាំ ព្រមទាំងសមាជិកសមាជិកាគណបក្សប្រជាជនកម្ពុជា បានផ្ញើសារថ្វាយព្រះពរ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅក្នុងឱកាសព្រះរាជពិធីបុណ្យខួបលើកទី១៩ នៃការយាងគ្រងព្រះបរមសិរីរាជសម្បត្តិព្រះអង្គ នៅថ្ងៃទី២៩ ខែតុលា ឆ្នាំ២០២៣។

សារលិខិតថ្វាយព្រះពរនាថ្ងៃទី២៨ ខែតុលា ឆ្នាំ២០២៣ សម្តេចតេជោ ហ៊ុន សែន បានបួងសួងដល់វត្ថុស័ក្តិសិទ្ធិទាំងឡាយក្នុងលោក គុណបុណ្យព្រះរតនៈត្រ័យកែវទាំងបី ទេវតាថែរក្សាព្រះមហាស្វេតច្ឆត្រ បុណ្យបារមីនៃព្រះវិញ្ញាណក្ខន្ធអតីតព្រះមហាក្សត្រ ព្រះមហា ក្សត្រិយានីខ្មែរ ពិសេសព្រះវិញ្ញាណក្ខន្ធ ព្រះបរមរតនកោដ្ឋ សូមតាមប្រោះព្រំទ្រទ្រង់ថែរក្សា ព្រះករុណាជា អម្ចាស់ជីវិតលើត្បូង និងសម្តេចព្រះវររាជមាតាជាតិខ្មែរជាទីគោរពសក្ការៈ យូរអង្វែងតរៀងទៅ។

សារថ្វាយព្រះពររបស់សម្តេចតេជោ បានបញ្ជាក់ថា៖ «ទូលព្រះបង្គំយើងខ្ញុំទាំងអស់គ្នា សូមប្តេជ្ញាដង្ហែតាមព្រះរាជតម្រិះដ៏ភ្លឺស្វាងរបស់ព្រះករុណាជាអម្ចាស់ ជីវិតលើត្បូង ដោយឥតងាករេ ហើយប្តេជ្ញាបន្តការពារដាច់ខាតនូវរបបរាជានិយម ការពារអង្គព្រះមហាក្សត និងសម្តេចព្រះវររាជមាតាជាតិខ្មែរ ជាទីសក្ការៈ ការពាររដ្ឋធម្មនុញ្ញ ឯករាជ្យ អធិបតេយ្យ និងបូរណភាព ដែនដីនៃព្រះរាជាណាចក្រកម្ពុជា ឱ្យឋិតថេរគង់វង្សជារៀងរហូតតទៅ»។

ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាព្រះរាជបុត្រ របស់ព្រះករុណា ព្រះបាទសម្ដេចព្រះ នរោត្ដម សីហនុ និងសម្ដេចព្រះរាជអគ្គមហេសី នរោត្តម មុនីនាថ សីហនុ។ ព្រះអង្គត្រូវបានក្រុមប្រឹក្សារាជសម្បត្តិជ្រើសតាំងជាព្រះមហាក្សត្រនៃព្រះរាជាណាចក្រកម្ពុជា បន្តពីព្រះបិតា ក្រោយពេលដែលព្រះអង្គបានដាក់រាជ្យ កាលពីថ្ងៃទី៧ ខែតុលា ឆ្នាំ២០០៤ និងបានឡើងគ្រងរាជ្យនាថ្ងៃទី២៩ ខែតុលា ឆ្នាំ២០០៤៕